អាជ្ញាធរជាតិអប្សរា ងាកមកប្រើប្រាស់របងឫស្សីសម្រាប់ហ៊ុមព័ទ្ធការដ្ឋានជួសជុលប្រាសាទ ដើម្បីកាត់បន្ថយការប្រើប្រាស់ប្លាស្ទិក
សៀមរាប៖ អាជ្ញាធរជាតិអប្សរា បានងាកមកប្រើឫស្សី មកជំនួសការប្រើប្លាស្ទិកជាតង់ ឬស្បៃសម្រាប់ហ៊ុមព័ទ្ធនៅតាមការដ្ឋានជួសជុលនានាក្នុងតំបន់អង្គរវិញ ដើម្បីរួមចំណែកកាត់បន្ថយការប្រើប្រាស់ប្លាស្ទិក។
បច្ចុប្បន្ននេះក្រុមការងារ នៃអាជ្ញាធរជាតិអប្សរា កំពុងងាកមកប្រើប្រាស់វត្ថុធាតុដើមធម្មជាតិដូចជា ឫស្សី ដែលនឹងផ្តល់ការងារកាន់តែច្រើនដល់ប្រជាពលរដ្ឋក្នុងមូលដ្ឋាន ព្រមទាំងធ្វើឱ្យបរិស្ថាននៅតាមការដ្ឋានក្នុងឧទ្យានអង្គរកាន់តែប្រសើរឡើង។
អាជ្ញាធរជាតិអប្សរា បានកែសម្រួលរោង និងរបងហ៊ុមព័ទ្ធនៅតាមការដ្ឋានជួសជុលនានាក្នុងតំបន់អង្គរ ដោយកាត់បន្ថយការប្រើប្រាស់ប្លាស្ទិកជាតង់ ឬស្បៃមួយជំហានម្តងៗ ដោយប្រើប្រាស់វត្ថុធាតុដើមធម្មជាតិដូចជា ឫស្សីជំនួសវិញ៕
